Inang ko

(alay ko po sa mga nanay!)

Inang, malagip mo daguiti law-lawas?
dinamag mo, “ania’t ambisyon mo?”
sa ka pay immisem ‘ti nagimnas
“kastoy kayat ko…,” sungbat toy numo.

Ubingak pay, agpal-pallailang
Ar-arapaapek kinabaknang
‘biit laeng, wen, mabiit laeng
Magun-od kon to daguitoy, Inang!

Manon a lawas iti naglabas..
Kada innem a domingo, bayad!
Puyat ken bisin, diak maiyebkas
Tuok ken rigat; ragsak-napeggad!

Wen, Inang, maudin a semester,
Bassiten a rigat ken sagaba
Dumadnin ‘ti panagsuwerte
Nam-namaem, kasla kan to reyna!

Inang, Inang, ania’t ayan mo kadi?
Apay ta ‘di ka immay idi kalman?
Nagragsak met, ah, ‘ti graduation mi!
Apay ta di immay? …awan kwartam?

Nagpintas, Inang, daytoy diplomak!
Napalalo’t luak a nangawat
Nakaisemak! Inang, nagragsak!
…uray awan kaduak a nangawat…

Inang, adda akon!
Ayna! Nagadu’t taon!
Sangakarrubaan!
Aglap-lapusanan!

Ney! Apayen daguitoy atong?
Ni inang ko, ayan nan, manong?
Inang! Inang! ‘nia’t ayan mon?
Ayan mon aya, Inang? Ayan mon?